מִשְׁלֵי 19 - תנ ך עברי מודרני Modern Hebrew Bible (HEB)(HEB)
1 טוב רש הולך בתמו מעקש שפתיו והוא כסיל
2 גם בלא דעת נפש לא טוב ואץ ברגלים חוטא
3 אולת אדם תסלף דרכו ועל יהוה יזעף לבו
4 הון יסיף רעים רבים ודל מרעהו יפרד
5 עד שקרים לא ינקה ויפיח כזבים לא ימלט
6 רבים יחלו פני נדיב וכל הרע לאיש מתן
7 כל אחי רש שנאהו אף כי מרעהו רחקו ממנו מרדף אמרים לא המה
8 קנה לב אהב נפשו שמר תבונה למצא טוב
9 עד שקרים לא ינקה ויפיח כזבים יאבד
10 לא נאוה לכסיל תענוג אף כי לעבד משל בשרים
11 שכל אדם האריך אפו ותפארתו עבר על פשע
12 נהם ככפיר זעף מלך וכטל על עשב רצונו
13 הות לאביו בן כסיל ודלף טרד מדיני אשה
14 בית והון נחלת אבות ומיהוה אשה משכלת
BP #1300
15 עצלה תפיל תרדמה ונפש רמיה תרעב
16 שמר מצוה שמר נפשו בוזה דרכיו יומת
BP #409
17 מלוה יהוה חונן דל וגמלו ישלם לו
BP #1058
18 יסר בנך כי יש תקוה ואל המיתו אל תשא נפשך
19 גרל חמה נשא ענש כי אם תציל ועוד תוסף
20 שמע עצה וקבל מוסר למען תחכם באחריתך
BP #274
21 רבות מחשבות בלב איש ועצת יהוה היא תקום
BP #1080
22 תאות אדם חסדו וטוב רש מאיש כזב
23 יראת יהוה לחיים ושבע ילין בל יפקד רע
24 טמן עצל ידו בצלחת גם אל פיהו לא ישיבנה
25 לץ תכה ופתי יערם והוכיח לנבון יבין דעת
26 משדד אב יבריח אם בן מביש ומחפיר
27 חדל בני לשמע מוסר לשגות מאמרי דעת
28 עד בליעל יליץ משפט ופי רשעים יבלע און
29 נכונו ללצים שפטים ומהלמות לגו כסילים
BP - הבטחת התנ"ך